O ENIGMA ALBIXOI

Múdome de lugar

2009-02-25T00:31:00.003+01:00

Despois de tres anos en blogger, múdome a blogaliza. Alí continuarei achegando todo o que se pase pola cabeza. A miña nova dirección é albixoi1314.blogaliza.org.
Agardo vervos por alí.

Queremos debate

2009-02-18T23:16:00.001+01:00

Queremos debate. Queremos contrastar programas. Queremos un debate a 3 e despois, máis debates. Pero quen se agocha, non pode reclamar nada.

A cultura segundo Anxo Quintana

2009-02-18T13:11:00.001+01:00

Interesante reflexión sobre o que queremos que sexa a cultura e a lingua do noso País.

Galego e castelán segundo Anxo Quintana

2009-02-13T00:55:00.001+01:00

Unha moi boa reflexión, a xeito de monólogo, sobre a actual situación do galego e castelán.

Hoxe fago 34

2009-02-06T01:07:00.001+01:00

Tal día coma hoxe, de hai 34 anos, vin a luz.

Sobre o voto emigrante

2009-01-28T18:59:00.005+01:00

Interesante reflexión do líder do BNG á Presidencia da Xunta. Contrasta coa opinión do Candidato do PSdG e actual Presidente da Xunta en funcións, Emilio Pérez Touriño.

Tregua no masacre de Gaza

2009-01-19T15:51:00.002+01:00

O exército israelita vén de pór en práctica unha tregua e posterior retirada do territorio de Gaza. Quizais sexa unha chiscadela á toma de posesión de Obama. Aínda que houbo refregas entre as dúas partes, esta noite pasada cesaran os brutais bombardeos sobre a cidade. Agardemos que esta tregua sirva para pór fin a esta operación sen sentido.

Unha escola da ONU, bombareada polo exército israelita

2009-01-17T18:21:00.002+01:00

Dous nenos foron as vítimas do bombardeo do exército israelita sobre unha escola da ONU. Esta nova acción de barbarie volve demostrar, unha vez máis, que os movementos do exército hebreo, alén de descabezar o movemento Hamas, tamén vai contra a poboación civil, incumprindo deste xeito todas as normativas da Convención de Xenebra. Cómpre que a manifestación de mañá en Santiago faga o que os nosos dirixentes políticos non se atreven a facer: Condenar este acto de masacre levado polo exército xudeu.

Mil trescentos mortos

2009-01-16T19:18:00.006+01:00

Son xa mil trescentos os mortos no acto de xenocidio en Gaza. Mentres que dure esta masacre, penso dedicarlle cada día un post sobre esta vergoña que ningunha nación europea aínda tivo valentía de protestar. Pedimos a expulsión do cónsul en España mentres que dure este acto de xenocidio. Unha pequena mostra:

Blog de María Velasco.

Mil mortos

2009-01-15T18:49:00.001+01:00

Fará algo EUROPA para deter este masacre? Boicot aos produtos israelitas. Intervención xa!

Sobre volframio e fósforo

2009-01-14T10:05:00.005+01:00

Só lles quería lembrar ás autoridades israelitas que estes dous elementos, volframio e fósforo, son empregados na actualidade para facer, no primeiro caso, filamentos de lámpada e, no segundo, para a cabeza dos mistos. Isto é, para alumear a humanidade. Todo emprego espurio destes elementos (compoñentes de bombas para realizar masacres) está prohibido.

Actualización (15-1-09): Os mortos elévanse a máis de 1.000, dos que máis de 300 son nenos. Confírmase o emprego de fósforo branco, totalmente prohibido pola Convención de Xenebra.

Paremos o masacre

2009-01-10T12:17:00.003+01:00

Vía: Eyad Baba | AP

Non fagamos deste neno un mártir. É hora. Paremos este masacre sen sentido.

Galiza como proxecto

2009-01-07T19:06:00.007+01:00

Fonte: Gzvideos

Paremos o masacre de Gaza

2009-01-04T02:51:00.003+01:00

Fonte: Lavozdegalicia.es

PAREMOS XA O MASACRE DE GAZA! Pido desde este humilde recuncho que presionemos a todos os nosos gobernos para que obriguen ao estado de Israel a parar a ofensiva xenocida en Palestina.

ALTO Á AGRESIÓN XENOCIDA DE PALESTINA.

Os conflitos só se resolven coas palabras. As guerras só traen guerras. RACHEMOS O CÍRCULO VICIOSO. Recuperemos a cordura. Paremos esta matanza inútil.

Bo 2009

2009-01-01T00:42:00.002+01:00

Bo 2009 para todos os homes de ben. E un desexo: PAREMOS O HOLOCAUSTO DE GAZA!

Galiza continúa invicta

2008-12-28T00:23:00.003+01:00

Fonte: lavozdegalicia.es

A selección galega de fútbol masculina continúa invicta despois de derrotar nun partido disputado no estadio de Riazor ao combinado de Irán polo resultado de 3 goles a 2. Destacadísima foi a actuación do xogador do Glasgow Rangers, Nacho Novo, que materializou 2 dos tres tantos da selección irmandiña.

O partido foi seguido por uns 15.000 espectadores que animaron en todo momento á nosa selección.

O encontro de hoxe amosou, unha vez máis, o alto nivel dos xogadores galegos. Agardemos que esta selección continúe en anos vindeiros a súa existencia.

Boas festas

2008-12-24T17:07:00.001+01:00

Desde este pequeno recuncho, Boas festas a todos os homes de ben.

Feijoo quere impulsar o bipartidismo

2008-12-15T23:50:00.004+01:00

Asisto estupefacto no programa Hai Debate da galega á entrevista –claramente pactada– que lle realizan a Alberto Núñez Feijoo. Alén de que o tema da lingua non foi para nada tocado, Alberto Nuñez Feijoo lanza a idea de que é necesario un debate a dous: isto é, un debate entre el –segundo as súas palabras o partido que vai gañar as eleccións– e Touriño –o único que pode Gobernar–. Esquécese o sr. Feijoo que Touriño pode ser Presidente só se o grupo parlamentar do BNG chega a un acordo programático co PSOE. E este argumento creo que é suficientemente de peso como para desbotar o debate a dous. É máis, o sr. Feijoo fixo, segundo o meu parecer, uns vaticinios que ben puidesen mudar de aquí a marzo. Ben fose posíbel que se producise o famoso sorpasso tantas veces intentado polo PC sobre o PSOE.

Creo que a formulación de Feijoo pretende converter Galiza nun país bipartito, perdendo dese xeito a riqueza parlamentar que neste momento gozamos.

Yes, he can

2008-11-05T05:06:00.002+01:00

Todos con Obama

2008-11-04T14:58:00.001+01:00

Por un mundo mellor, todos con Obama.

Castelao e La Vanguardia

2008-10-28T01:33:00.006+01:00

Vía Vieiros coñezo que o xornal catalán La Vanguardia acaba de facer público todo o seu fondo xornalístico na rede. É accesíbel para todo o público desde o primeiro xornal editado. Se pesquisamos un pouco dentro del, atopamos unha manchea de noticias que vencellan a Castelao con este insigne xornal. Déixovos unha imaxe para que poidades ler o que nese día se dicía sobre o noso máis senlleiro escritor.

Se quixerdes ver o que se publicaba nese día, premede aquí.

Por que hai que refundar o capitalismo?

2008-10-22T20:07:00.001+02:00

Se acaba de provocar a maior crise financeira e os mozos comezan a ler outras cousas, por que hai que refundar un sistema que só pensa no beneficio rápido e sen preocuparse de quen leve por diante. Non será mellor buscar unha alternativa?

Socialicemos a perdas, privaticemos os beneficios

2008-10-11T00:51:00.003+02:00

Ante a crise do modelo capitalista, a intelixencia do capital está a pór unha vez máis as súas teses en práctica. Socializar a perdas, e cando houber, privatizar os beneficios. Isto é que paguen os de sempre. Despois de case 20 anos da caída do Muro de Berlín e da caída de todo un sistema, o poderoso capitalismo críase invencíbel. Pero xa o filósofo alemán predicira cal sería o seu verdadeiro inimigo: O propio sistema capitalista. Un sistema insolidario que só atende ao beneficio rápido. O libre mercado que segundo os neocons se autorregula. Outra falacia. Agora é o momento de que os popes do sistema dean unha explicación. É a hora de pedir responsabilidades. É a hora de que os grandes mercaderes do mundo moderno, A BANCA MUNDIAL, arrime o ombro e deixe de pedir garantías aos estados. É hora de ir pensando noutro sistema. Porque a inxección de capital por parte dos Estados non é máis que un parche, un remendo até a próxima crise financeira. É hora de que á sociedade non lle toque, como sempre, socializar as perdas. É hora de que os Estados pidan responsabilidades e sobre todo, participar dos beneficios. Os beneficios de todos.

Grande Depor

2008-10-03T00:00:00.004+02:00

Fonte: La Voz de Galicia

Hoxe vivimos un grande partido de fútbol. O Deportivo tiña un resultado adverso de 2 goles a cero, mercé á súa visita ao campo do Brann hai quince días. Prevíase un partido duro. Realmente foi así. Se ben as cousas pintaban ben aos 17 minutos grazas a un gol de Colotto, dous minutos despois perdiamos un efectivo. Ricky, mercé a dúas accións moi discutíbeis, foi expulsado. A remontada semellaba un pouco máis afastada. Pero foi aquí onde o espírito de hai anos posuíu ao Depor. Os dez xogadores convertéronse en perfectos gladiadores que tiñan que loitar contra once fornidos viquingos e un árbitro ao que lle veu moi grande o partido –realmente o home non sabía nin que pitaba. Había tempo que non vía un colexiado tan, tan malo–. Xa na segunda parte Colotto noutro saque de esquina conseguía o seu segundo gol de cabeza. A remontada estaba máis preto. Pero o resultado non se movería até a fin do tempo estendido. A lotaría dos penaltis deparaba o noso futuro. Aquí xurdiu a figura de Aranzubía –realmente teño que admitir que é un porteiro que non me gusta nada–. Parou tres dos catro lanzamentos que lle fixeron.

Hoxe foi un deja vú de anos pasados. Agardemos que vivamos máis momentos como estes.

Feira do Libro e novos coñecementos

2008-08-08T20:13:00.005+02:00

Esta semana grazas á Semana do Libro da Coruña fun un pouco máis feliz. Por unha parte, gocei duns marabillosos actos de presentación de varios libros. Fentina Lente, Incertos, Atracción Total ou Toponimia de Galicia foron unhas das presentacións ás que asistín. Pero estes actos, á vez que interesentantes e culturais, tamén me serviron para coñecer xente. Agardemos que a edición do ano que vén depare tamén novas sorpresas.

Feira do Libro Coruña

2008-08-02T23:41:00.004+02:00

Mentres revisaba algúns blogs, vin que varios blogueiros se queixaban de que non coñecían os actos da Feria do Libro. Para subsanar este erro da organización, permítome escanear o programa para quen lle interesar.

Actos domingo 3 agosto

2008-08-02T22:29:00.002+02:00

Queixábase Brétemas das condicións nas que se está a celebrar a 37 Feira do Libro da Coruña. Alén de se laiar da escasa presenza do libro galego nesta mostra, tamén facía fincapé na escasa visibilidade dos actos que están a ter lugar.

Quero, desde esta modesta tribuna, achegar o calendario das actividades que se van desenvolver cada día na Feira. Velaquí o día de mañá.

Xeira de contrastes

2008-08-02T20:51:00.004+02:00

Este sábado foi un día de contrastes. Morte e creación reunidos nun día do almanaque. A morte facía aparición cando me desprazaba a un acto literario nos Cantóns de Méndez Núñez á altura de Alcampo. Unha anciá xacía morta no duro e negro asfalto por unha colisión cun coche desfeito. Mal agoiro. Negro fasto. Lembro que impactado cavilei no condutor, que eu tamén era, nas sensacións que estaría a sentir nese momento. Segara unha vida. Ben, quizais o infortunio levase a aquela pobre anciá a atravesar unha estrada moi transitada nun momento inoportuno. Fose de quen for a culpa, o resultado era o mesmo. Unha vida deixara de existir.

Con este panorama no horizonte, teño que admitir que o acto literario xa deixara de ter importancia, despraceime á Coruña. Eis que aquí o Universo tiña, se é posíbel reparar unha morte, un pequeno gran de fermosura. O acto de presentación foi fermoso. Sobre todo o final no que o autor acompañado do músico Pulpiño Viascón recitou uns pequenos poemas que mesmo encheron por uns momentos de bágoas os ollos do escritor. Lembroume unha vez máis o carácter tan humano deste home. Tivera a sorte de compartir con el unha viaxe desde Vigo á Coruña no meu coche despois de saírmos da Editorial Xerais. Teño que recoñecer que ese último poema que o emocionou a min tamén me tocou.

Mais o día tamén tiña unha nova sorpresa. Unha vella amiga da facultade reaparecía, aínda que fose a xeito de crítica literaria na miña vida.

Actualización (3-08-2008): Estaba trabucado no accidente. A morte da anciá foi pola colisión do vehículo no que ía contra un autobús urbano.

Xa teño un imac

2008-07-10T23:15:00.002+02:00

Hoxe, 10 de xullo, acabo de estrear o meu imac de 24 polgadas. Realmente é unha marabillosa máquina que, polo de agora, é un completo enigma para min. O sistema mac aínda é todo un descoñecido para este pobre usuario de Windows. Agardo que para o futuro esta bela máquina e máis eu teñamos unha fermosa relación.

Impresionante Rusia

2008-06-21T23:26:00.007+02:00

Vía: Lavozdegalicia.es

Despois do partido de hoxe contra Holanda, a selección rusa postúlase como unha firme candidata para conseguir o título da Eurocopa. Perfecta vinganza da final do 88.

Un novo camiño

2008-05-31T10:45:00.005+02:00

Desde onte, 30 de maio, o barco da miña vida sae do porto cara a un novo destino. Onte foi o meu derradeiro día en Seamo. Atrás quedan días e días de reparto nunha furgoneta. Motores de arranque, alternadores, buxías, quentadores e todo o que poidades imaxinar sobre o subministro eléctrico do automóbil pasou pola miñas mans. Pero en todo este tempo non só me dediquei ao reparto. A miña outra profesión tamén estivo moi vixente. A tradución de textos para o galego para a editorial Xerais ocupou, se callar, moitas máis horas que a miña vida en Seamo. Froito disto algúns libros da miña tradución saíron á rúa. Desde A cidade e os días (en colaboración con Brétemas), Alimentación Saudable, ou libros de texto para 1º de Bacharelato da nova asignatura Ciencias para o mundo contemporáneo, ou algún de 3º de ESO levan o meu modesto selo. Este volume de traballo fixo que neste ano e medio practicamente non tivese vida. Dun traballo para o outro. Entón xurdiu a elección. Seamo ou tradución. Os meus anos de estudo e os meus gustos facilitaron a elección.

Un día feliz

2008-05-10T23:05:00.006+02:00

Foto: Xerais

Hoxe, 10 de abril, foi presentado no Museo Marco de Vigo a tradución que realizamos Manuel Bragado e eu do libro de Xosé María Álvarez Blázquez A cidade e os días. Teño que recoñecer que a tarefa da tradución nos requiriu un grande traballo, xa que nos enfrontabamos a unha obra que recolle, a modo de almanaque, a historia de Vigo durante os 365 días do ano. Dende o ano 60 despois de Cristo até 1936 o autor fai unha descrición dos feitos máis importantes que sucederon na cidade olívica.
O acto foi dunha grande carga simbólica. As palabras vertidas polo propio Manuel Bragado, o fillo do autor, Alfonso Álvarez Cáccamo, Lino Vázquez Gil, amigo e compañeiro de Xosé María Álvarez Blázquez, Ceferino de Blas, como Director Xeral de Faro de Vigo, xornal onde o autor publicou cada día durante o ano 1959 unha columna xornalística co fito máis importante da historia de Vigo, e do alcalde de Vigo, Abel Caballero, puxeron de relevo a importancia e a necesidade da obra.
Foi, como vos dixen, un día inesquecible. Mereceu a pena o esforzo realizado.

25 de Abril

2008-04-26T13:00:00.002+02:00

Vía a web do meu amigo engalego 3.0, coñezo este vídeo dun programa da TVG do ano pasado que conmemoraba a figura do Zeca Afonso. Galegos e portugueses a unha soa voz. Quizais a non moito tardar, os tempos son chegados.

Acadei os 10.000

2008-04-12T16:51:00.003+02:00

O enigma albixoi está de parabéns. Dez mil visitas desde o seu comezo. Moitos post e outros moitos comentarios. Grazas a todos os que por aquí pasaron. Agardo que a lectura dalgún post axudase a reflexionar ou a gozar un pouco máis da vida.

Momentos de transición

2008-04-06T20:17:00.003+02:00

A historia do ser humano componse de momentos de transición. Momentos que o fan estar arriba, momentos que o levan inexorabelmente cara a abaixo. Un continuo tic-tac que modifica cada vida. Nun momento estamos ledos, ao seguinte tristes. É a ironía da vida humana. O non saber que nos vai deparar o futuro. Felicidade e tristura, nun contrapunto perfecto. Simplemente a vida.

Google sky

2008-03-22T23:32:00.001+01:00

Vía microsiervos, coñezo esta nova aplicación de Google que nos permite aprofundar máis no coñecemento do Universo.

Elección 9 marzo 2008

2008-03-09T16:16:00.002+01:00

Vía Brétemas coñezo esta aplicación web. A ver que deparan as eleccións para o nacionalismo galego.

Quintana, Touriño, Feijoo

2008-02-28T20:52:00.003+01:00

Foi o primeiro debate entre os tres máximos representantes da política galega. Foi tamén o primeiro esforzo de poñer a Galiza no debate das próximas eleccións ao parlamento español do 9 de marzo. Tres posturas, tres visións, pero quizais, só dúas maneiras de entender Galiza: unha orgullosa que se quere desenvolver por ela mesma, outra que se ve dependente de Madrid. Para min, Quintana por moito que trataron de agochar os medios de comunicación foi o verdadeiro gañador do envite. Agora somos nós os que temos que nos expresar o 9 de marzo e confiar nas nosas posibilidades.

Marcha o Comandante

2008-02-20T00:04:00.003+01:00

E Fidel dixo «até aquí». Hoxe, 19 de febreiro de 2008, por medio do diario Granma, Fidel renunciou á xefatura do Estado e a Presidencia do estado caribeño. Marcha un referente das loitas revolucionarias do século XX. Marcha, quizais, un dos últimos que creron que outro modelo social era posible. O futuro, como a súa célebre frase «A HISTORIA ABSOLVERAME», ditará sentenza.

Trixésimo terceiro aniversario

2008-02-06T21:21:00.000+01:00

Baixo este tan pomposo título agóchase unha realidade. Hoxe fago 33 anos. Toda unha vida que diría o outro. Agardo que todos os que ledes este pequeno espazo do ciberespazo poidades compartir comigo moitos aniversarios máis.

Cincuenta e un millóns de motivos para pensar o noso voto

2008-01-10T21:26:00.000+01:00

As eleccións do 9 de marzo van representar un momento definitivo sobre o que Galiza vai facer co seu futuro. Albíscanse dúas opcións: continúar votando aos partidos de carácter estatal, que prometen, prometen, prometen, pero que o AVE continúa sen chegar, ou decidírmonos dunha vez por mirar cara a nós mesmos e apoiarmos decididamente a un partido que, aínda que moitos criticaron, conseguiu un fito histórico: Cobrar do Estado 51 millóns de euros da débeda histórica en materia social. Chámaronos «pedigüeños», pero amosaron que unha forza que so se debe a Galiza conseguiu o que «outros» en 30 anos de democracia non fixeron. O noso voto decidirá o noso futuro. Xa é hora de apostarmos polo noso. A historia débenolo.

Feliz 2008

2008-01-01T19:47:00.001+01:00

A todos os homes de ben, feliz 2008.

NUNCA MÁIS, NUNCA MÁIS

2007-11-13T21:19:00.000+01:00

Hoxe conmemoramos (se esta data se pode celebrar) o 5 aniversario da desgraza do Prestige. Daquel desastre algunhas cousas mudaron para mellor: produciuse un cambio no goberno galego, o pobo galego tomou conciencia da súa existencia e revelouse contra o polifemo de chapapote, e fixeron parecer a Galiza no escenario mundial. Desde aquela, este recuncho do planeta xa era coñecido. Unha marea de indignación e de rebeldía (Nunca Máis) asolagou o planeta Terra. Pero non todo foi positivo. Meses despois, os que produciran este desastre volveron ser votados nas eleccións. Nas lexislativas do país galego quedaron a un só escano de revalidar a maioría. O tempo, que en moitas causas axuda a sandar a feridas, produciu un efecto narcótico nalgunha poboación. Foi como se o Prestige nunca tivera sucedido. Como se os que o produciran actuaran da mellor forma posible. Esta narcolepsia foi hoxe moi constatable nos medios de comunicación estatais. Nin un telexornal fixo referencia a esta data. Galiza unha vez máis voltaba ser un protagonista de segunda fila. Iso si, como sempre, até o próximo Prestige.

O PP e a COPE menten

2007-11-01T15:24:00.000+01:00

O que di Jiménez Losantos non ten desperdicio. MENTEN, MENTEN, MENTEN!

Cando deixará o PP a teoría da conspiración?

2007-10-31T20:29:00.000+01:00

Despois das declaracións de Mariano Rajoy sobre o 11 M, temos que pensar se imos permitir que este partido de ultras (léase PP) é merecente de gobernar España. Eu, sinceramente, creo que NON. Menten, menten e volven mentir co único obxectivo de gañar o poder. NON MÁIS MENTIRAS!

A Juan Antonio Cebrián, IN MEMORIAM

2007-10-22T20:23:00.000+02:00

O pasado sábado, día 20 de outubro, deixounos. Un traizoeiro infarto privounos do que, para min, era o mellor xornalista da radio. Recoñézome fiel seguidor do seu programa, LA ROSA DE LOS VIENTOS. Desde o sábado, temos un motivo menos para sermos felices.

40 anos sen o Che

2007-10-09T22:50:00.000+02:00

Hoxe celébrase o 40 aniversario do asasinato do Che. Un heroe que o tempo non desvanece. Como mostra déixovos un dos seus discursos e da vixencia que aínda teñen. ATÉ A VITORIA SEMPRE!

Tamén un interesante blog.

25 anos do BNG

2007-10-05T23:48:00.000+02:00

Temos que escoitar a explicación do profesor Beiras. Toda unha lección maxistral.

Aconteceu hai un ano

2007-09-25T22:34:00.000+02:00

Era un 25 de setembro coma hoxe. Todo semellaba normal, mesmo amencera mellor ca hoxe. Non chovía. Pero foi algo distinto. A miña avoa pasaba a súas derradeiras horas neste mundo. Primeiro un coma e despois simplemente o seu corazón deixou de latexar. Noventa e catro anos de existencia desaparecían e con ela moita da miña historia. Por iso, avoa, IN MEMORIAM: NUNCA TE ESQUECEREI.

Antonio Puerta, in memoriam

2007-08-28T18:37:00.001+02:00

Hoxe á tarde faleceu, despois dunha parada cardiorrespiratoria no partido Sevilla-Xetafe, Antonio Puerta. Era un profesional do fútbol e nos próximos días ía ser pai. Lonxe do histrionismo dos cracks mediáticos, este xogador representaba o fútbol en estado puro.

Temos que quitarlle a condición de galego a Rajoy?

2007-08-23T20:35:00.000+02:00

Despois das declaracións de Mariano Rajoy sobre a importancia de os nenos coñeceren o himno galego e o idioma propio, pido que lle sexa retirada a condición de galego a Mariano Rajoy. Unha vergoña para todos os galegos de ben.

Somos os galegos un pobo esquizoide?

2007-08-20T21:51:00.000+02:00

Levo matinando moito tempo sobre esta cuestión. O meu traballo de repartidor confíreme moi abondosamente tempo para reflexionar sobre este tipo de cousas. Inquírome sobre se a existencia de dous idiomas no noso país, alén de poder ser considerado como unha riqueza, non fai que divida a nosa sociedade e faga que medre nela un sentimento de esquizofrenia colectiva que nos leva a denigrar o que é noso. Con este tipo de comportamentos teño que lidiar todos os días. Teño que recoñecer que a empresa na que traballo o afecto cara a lingua que nos é propia non é demasiado boa. Teoría que eu supoña xa ultrapasadas aínda andan na mente dos meus compañeiros. Teño que recoñecer que, quizais a miña formación académica me faga ver a realidade doutra maneira. Pensamentos e condutas que a calquera filólogo lle semellarían aberrantes están aínda moi presentes. Estamos no 2007, pero semella que non pasamos aínda do 39. Moito teremos que mellorar se queremos deixarlle algo a todos os que nos han de seguir. Sermos un pobo diferenciado depende diso.

Rebentou a igrexa de Albixoi

2007-07-22T14:27:00.000+02:00

Semella incríbel, pero foi así. O lanzamento dunha bomba para conmemorar a festa da parroquia provocou que as outras bombas que estaban na sancristía fixesen explosión. O tellado, tanto da sancristía como dunha parte da igrexa foi destruído. Os cristais e a porta de entrada tamén romperon. Afortunadamente non houbo que lamentar danos persoais. Unha sorte.

O galego de Estremadura

2007-07-11T23:04:00.000+02:00

Vía Vieiros, coñecín este vídeo que amosa o galego conservado en tres lugares de Estremadura. Merece a pena velo.

Debate do Estado 2007

2007-07-04T21:05:00.000+02:00

Un ano máis, Galiza pasou sen máis pena nin gloria polo debate do Estado. Unicamente o representante do BNG, Francisco Rodríguez, deixou constancia da nosa presenza. Un ano máis fíxose claro que Galiza precisa máis que nunca un grupo parlamentar propio para que as nosas demandas sexan escoitadas. Non podemos perder máis tempo. Nas próximas eleccións temos que conseguir un grupo propio. O noso futuro depende diso.
Se non puidestes ver a intervención do noso representante, déixovos aquí a súa intervención.

O espazo desde o espazo

2007-06-13T08:09:00.000+02:00

Se fordes uns apaixonados do espazo, déixovos aquí un enlace coa páxina da Nasa para que vexades as evolucións do ISS. Só hai que entrar en Launch NASA TV Viewer e o espazo será noso.

Normalización lingüística

2007-06-09T12:03:00.000+02:00

Estes días estou a observar que vivimos nun país de esquizoides. En ningún lugar do mundo, en ningún, un pobo loita contra unha lei que por primeira vez no que levamos de historia intenta recuperar o emprego do seu idioma. Pero como diría o eslogan franquista adaptado «Galicia is different». Unha panda de, non sei moi ben como definilos, lanzou unha páxina para «defender» o que eles cren que é unha vulneración dos seus dereitos lingüísticos. Argumentan, todos cheos de razón, que o galego está a asoballar o castelán en Galiza. Que este goberno, e o que eles din, os nacionalistas radicais, queren extinguilo. Non saben, ou son moi tontos, que a historia demostra totalmente o contrario. A persecución desde que este territorio se definiu por ter unha lingua propia foi a da súa extinción. A asimilación a unha lingua que, se ben hoxe forma parte do noso país, non temos que esquecer que foi imposta pola forza. Aquí non houbo unha elección dos falantes. Primeiro a política de Doma e castración levada a cabo polos Reis Católicos e logo a política franquista quixo borrar do mapa o noso idioma e converternos nunha anexión de Castela. Porque, sexamos claros, eliminar un idioma é eliminar unha forma de pensamento distinto, que no fondo, é do que se trata todo isto.

Democracia en estado puro

2007-06-01T23:20:00.000+02:00

O pasado domingo fun escollido para realizar o labor de presidente dunha mesa electoral no lugar onde resido. Neste día puiden observar de preto todo o que supón unha xornada electoral. Voto, voto, voto. O destino dunha cidade nas mans do pobo. Cada voto contaba. Losada, Tello, Negreira, cal sería o vencedor? Os resultados parciais da miña mesa daban unha vitoria parcial ao actual alcalde interino Losada. 207 cidadáns coruñeses obtaran por esta opción. En segundo lugar, Carlos Negreira (do PP) obtivo 147 votos e de terceira opción resultou Quique Tello con 108 votos. A miña zona ditara sentenza e non entregara a maioría absoluta a ningún dos tres candidatos. Agora era a hora de que os tres se puxesen de acordo sobre o futuro municipal. Ou hai pacto ou a cidade veríase nunha espiral de ingobernabilidade. Un pacto PSOE-BNG reeditando o da Xunta semella o máis lóxico. Pero, desde a cidade eterna (Roma) ofrecía xa a súa postura: Losada ten que pactar co PP. Unha vez máis a Coruña pode ser a cidade do antigaleguismo. Os próximos días ditarán sentenza.

Aznar e o alcol

2007-05-05T17:39:00.000+02:00

Preséntovos aquí a última tolería deste «Grande EX-GOBERNANTE». Agora so temos que pensar en que mans estivemos gobernados!
NUNCA MAIS.

Morreu Ieltsin

2007-04-23T21:03:00.000+02:00

Hoxe morreu o home que fixo desaparecer a UNIÓN SOVIÉTICA. Hoxe finou o azoute do comunismo. Hoxe morreu un político que converteu unha superpotencia nun país do terceiro mundo. Hoxe morreu un adicto ao vodka. Hoxe morreu Boris Ieltsin. Tanta paz leve como calamidades deixou.

Memoria histórica II

2007-04-21T20:49:00.000+02:00

Nestes días vimos de observar como, de xeito machacón, os dirixentes do PP non cansaron de argumentar que á cidadanía non lle importaba a memoria histórica. Penso, e creo que non estou equivocado, que esta teimosía ben puidese ser porque investigar sobre o acontecido no período da Guerra Civil (1936-1939) e os posteriores 40 anos de ditadura franquista non os deixaría en moi bo lugar. Ante isto semella máis que necesario que o actual goberno faga un esforzo aínda maior por tentar recuperar a memoria dun tempo que «algúns» queren soterran para sempre.
As vítimas merecen unha exoneración dos seus falsos delitos.

Un novo blog

2007-03-13T22:40:00.000+01:00

Hoxe, martes e 13, acaba de nacer un novo blog. Unha estimada amiga dá os seus primeiros pasos no mundo da blogosfera. Dende aquí anímovos a que participedes das súas inquietudes, pensamentos, situacións. Unha nova blogueira vén arrequecer a realidade virtual galega. Mimémola.

Google Earth

2007-02-18T13:20:00.000+01:00

Impresionante.

Xa son condutor de primeira

2007-02-10T13:01:00.000+01:00

Onte e despois de un lote de prácticas e un suspenso conseguín, por fin, aprobar o carné de conducir D. Agora só me falta un camión.

Quilómetros, quilómetros

2007-01-18T23:03:00.000+01:00

Esta semana veño de me converter nun animal da estrada. De acabalo da miña Peugeot Expert percorro unha rota que vai desde Lañas (Concello de Arteixo) até o polígono de Bergondo (no concello de idéntico nome) . Taller tras taller vou deixando os pedidos. Unhas bombillas para un coche, un alternador, unha batería, etc. Así é un día. Entre taller e taller, mentres que un vai atento á condución, e naqueles pequenos momentos que a circulación permite un pequeno descanso, admiro a paixase. Estas viaxes son tamén bos momentos para as reflexións: a vida laboral, a vida social, a política, o Estatuto. Todo é posible nun traxecto. Unha experiencia que, polo menos unha vez na vida, todos teriamos que probar.

Unha nova etapa

2007-01-14T20:54:00.000+01:00

O ano 2007 veu cargado dunha nova sorpresa: Un traballo. Non é o que poderiamos chamar do máis «glamouroso» do mundo, pero a primeira oportunidade real de ir saíndo adiante na vida. A empresa en cuestión chámase SEAMO e ten como finalidade a venda de produtos eléctricos do automóbil. Por automóbil enténdese todo vehículo a motor, dende turismo a camións, pasando por motos e autocares. Polo momento estou de condutor dunha furgoneta no reparto. Estas dúas últimas semanas paseinas coñecendo cada un dos talleres aos que cada día terei que, sen a menor tardanza, levar as pezas que soliciten. Mañá, é o meu primeiro día de reparto so, un experiencia que vos irei relatando nos días sucesivos.

Memoria histórica

2006-12-20T01:46:00.000+01:00

Nestes días, con todo o balbordo arredor da Memoria Histórica, creo que a canción de Amaral, En el río, dá unha boa idea do que algúns pretenden: A DESMEMORIA.
Déixovos un enlace para que a escoitedes. Impagábel.

Fraga ou o retorno da vella garda

2006-12-13T01:53:00.000+01:00

Simplemente, a dereita democrática que temos. Fraga, volvendo aos seus comezos.

A NACIÓN GALEGA

2006-11-22T01:03:00.000+01:00

Nestes días, vimos de asistir estupefactos ás declaracións verquidas polo dirixente do PP en Madrid, Mariano Rajoy, polas que se nega a recoñecer o carácter nacional de Galiza. Lanza, pois, un órdago ao que a sociedade galega, se se considerar madura, non pode máis que responder cun «Galiza nación» ás bravuconadas do dirixente popular. O noso futuro depende diso. Agardemos que, por unha vez, saibamos estar á altura do que o país precisa de nós e non lle deamos as costas ao noso futuro.

Unha nova rota

2006-11-22T00:51:00.000+01:00

Estes días veño de comezar unha nova rota na miña vida. Desde o pasado luns, estou matriculado nunha autoescola para a obtención do permiso de conducir da clase C. Si, o que estades a pensar, o carné de camión. Tamén teño pensado quitar o D e máis o E, xa que nos tempos que corren, vai ser necesaria a apertura de varias frontes para conseguir un traballo. A ver que depara o futuro.

Catro anos da ignominia

2006-11-14T02:19:00.000+01:00

Catro anos do desastre. Catro anos do Prestige. Catro anos de grande resposta. Catro anos de triunfo da verdade. Pero, non esquezamos, NUNCA MÁIS.

O bolígrafo de Aznar

2006-10-24T02:40:00.000+02:00

Non quero deixar pasar a oportunidade de amosar a «magnífica» persoa que é o ex-Presidente do Estado español, José María Aznar. Como diría Jesulín: «Im-prezionante».

A Polémica do «L»

2006-10-24T02:10:00.000+02:00

Unha vez máis, e non son poucas, a cidade da Coruña vese envolta na «ditosa» polémica da denominación da urbe. Sobre deste particular, teño que dicir, dunha vez por todas, que o que teñen que facer as autoridades competentes é aplicar a normativa vixente e que non é nin máis nin menos que a lei de normalización lingüística. Nela, como é ben sabido de todos, explecitízase moi ben que a única denominación posible das poboacións de Galiza é o seu nome en galego. Calquera outra posiblidade como ben indica Brétemas é un lote de fume para desviar a atención.

A vida continúa

2006-10-11T00:55:00.000+02:00

Teño que recoñecer que estes días estiven con moi poucas ganas de escribir. O pasamento da miña avoa, a única que me quedaba, provocou en min unha sensación de abatemento. Desde aquí, quero agradecer a todos aqueles que me ofreceron o seu pésame e tamén a todos aqueles que o sentiron, pero que non se atreveron ou non quixeron escribir nada. Grazas a todos vós, serdes quen fordes. Nestas semanas de intensa actualidade política, teremos que reflexionar sobre o último debate do estado da Nación e o detonamento dunha arma nuclear pola República Popular de Corea. Prevese un inverno con fortes sensacións.

IN MEMORIAM

2006-09-28T07:38:00.000+02:00

Quero adicar este post á miña avoa, falecida o día 25 deste mes. AVOA, NUNCA TE ESQUECEREI!

Causalidades

2006-09-20T00:23:00.000+02:00

O día de onte foi toda unha experiencia na miña vida. Ben cedo, puxen rumbo cara a cidade olívica para un encontro con Brétemas. Amabelmente ofreceuse a me titorizar o meu traballo de fin de máster, o enésimo máster que realizo na procura dun traballo, e despois de me axudar a solucionar as distintas dúbidas que tiña ao respecto, ofreceume unha proposta coa que nunca soñaría: levar de compañeiro de viaxe cara a cidade herculina a...., a quen vos imaxinades? Certamente a resposta non é doada. Neste caso foi a Manolo Rivas. Como poderedes entender, a miña sorpresa foi maiúscula. E a miña emoción igual. A viaxe teño que dicir que foi simplemente marabillosa. Falamos do divino e do humano e o mellor foi a constatación de que me atopaba diante dun home que realmente era iso: un home común. Cos seus soños, as súas necesidades, a súa historia. Realmente o día de onte pasará a ser un dos mellores días da miña vida.

Beiras4

2006-09-15T02:58:00.000+02:00

Beiras3

2006-09-13T18:07:00.000+02:00

Beiras2

2006-09-13T17:51:00.000+02:00

Beiras1

2006-09-13T17:42:00.000+02:00

Figura importantísima no noso País, calquera cousa que diga é merecente de ser tida en conta.

A miña desaparición

2006-09-02T17:51:00.000+02:00

Teño que confesar que a miña desaparición do mundo blogueiro ten, como non ha ser doutra maneira, unha explicación ben sinxela. A empresa La Toja tivo a ben, por medio de Adecco, chamarme 16 días para que traballase na súa fábrica, sita no concello de Culleredo, por unha substitución de vacacións de persoal. O traballo, teño que dicilo, é totalmente rutinario: ou facer palets ou botar tubos de plástico para que unha máquina os encha de crema de dentes ou nunha cinta a botar botes que se enchen de gomina. Un traballo completamente en cadea, iso si, a remuneración é o mellor. O día 10 saberémolo.
Non quero deixar pasar a oportunidade para, unha vez máis, falar do Agosto horribilis que padecemos. Lume, onte mesmo o incendio dunha planta química en Caldas de Reis que vén de producir unha contaminación no río Umia, e que vén incrementar aínda máis o nefasto verán que pasamos. Agora a pregunta necesaria é, cando deixaremos de sermos referentes en traxedias?

Unha música moi significativa para estas traxedias

2006-08-24T02:17:00.000+02:00

Mes horribilis

2006-08-23T01:12:00.000+02:00

O mes de agosto do 2006 vai pasar como o mes horribilis de Galiza. O 5% do territorio queimado e aínda por riba 3 mortos nun accidente ferroviario do tren «de escasa velocidade» que une A Coruña/ Vigo con Euscadi. Semella que os galegos estamos condeados a sermos famosos polas catástrofes que sufrimos. É hora de reverter esta tendencia.

Quen son?

2006-08-11T02:40:00.000+02:00

Queremos saber quen son? Que pretenden? Queremos... acabar dunha vez con eles!
NUNCA MÁIS A UN INCENDIO

Arde Galiza 2

2006-08-09T01:04:00.000+02:00

Unha nova proba de que o desastre é xigantesco. Cárcere aos pirómanos!

Arde Galiza

2006-08-08T20:42:00.000+02:00

Fonte: www.lavozdegalicia.es

Estes días estase a librar en Galiza unha loita desigual entre os que queren que todo arda e os que consideran que este delito ecolóxico non traerá máis que prexuízos. Lume contra duchas. Arde a nosa terra e con ela o noso futuro.
Diversas son as teorías que se están a escoitar estes días: especulación urbanística, persoas con problemas psiquiátricos, descoidos. Fose o que que for este ano será lembrado como o ano do lume. Un mal comezo para o primeiro goberno que comezaba a poñer o país no seu ponto de mira. Miles de millóns queimados. Tres mortos. Demasiada bagaxe para que fiquemos impasibles. Estas accións merecen un castigo. Pero antes que nada, son necesarios máis recursos e unha maior formación cidadá para que no futuro só teñamos que ver estas accións como algo do pasado. Agardo, espero e desexo que o ano que ben só teñamos que lembrar como un mal soño este verán. Será signo de que algo aprendemos.

Unha proposta de Estatuto

2006-07-31T18:05:00.000+02:00

Déixovos aquí unha proposta de Estatuto. É unha das posíbeis. Agora é hora de entre todos facer realidade o mellor Estatuto posíbel. O noso futuro depende diso.

Paremos a guerra

2006-07-31T17:27:00.000+02:00

Fonte: www.lavozdegalicia.es

Nun conflito armado todos, ou case todos, teñen a culpa. Pero como dixo unha vez un home «uns máis ca outros».
O uso da forza indiscriminada que está a aplicar Israel contra o sur do Líbano sobrepasa toda liña. Só estúpidos coma Bush e a súa Condolezza son capaces de xustificaren algo tan desproporcionado. Agardemos que o conflito se poida parar a tempo antes que nos leve a todos por diante.

Un burato no cinto

2006-07-03T04:08:00.000+02:00

Un burato no cinto pode significar un cambio na cosmogonía dun ser vivo. Ou iso me quixeron facer crer. Será tan importante? Un cambio nun pequeno detalle da túa vida pode significar un cambio no teu futuro? Na forma na que te aprecian os demais? Na túa estrutura cerebral? Interesante cuestión.

Outro blog

2006-06-27T18:42:00.000+02:00

Quero, unha vez máis, recomendar o blog dun compañeiro e amigo de carreira. Toda a súa experiencia na fría e distante Alemaña.

Somos 8212 galegos menos

2006-06-17T03:06:00.000+02:00

Un índice da prosperidade dun país é o incremento da súa poboación. España grazas á inmigración aumentou 4 millóns de persoas. Galiza, como case sempre, pon o lado negativo da historia: perde 8212 habitantes con respecto ao ano pasado. Emigración, baixa natalidade e poucas perspectivas laborais produciron isto. As autoridades terían que ter en conta este dato e poñer mans á obra para reverter esta tendencia tan perigosa. O noso futuro depende diso.

Subcomandante Marcos 2

2006-06-16T00:21:00.000+02:00

Segunda parte.

Subcomandante Marcos

2006-06-16T00:04:00.000+02:00

Guerreiro dos tempos modernos. Loitador infatigable contra as inxustizas. A nova esperanza dun mundo mellor someteuse a unha entrevista con Jesús Quintero. Merece a pena escoitalo.

Somos unha potenzia

2006-06-13T23:21:00.000+02:00

Carlos Blanco foi o showman que onte á noite conduciu o intento de programa nocturno en versión galega. Teño que dicir que o formato me gustou. Humor, axilidade, pero sobre todo un programa de galegos feito para galegos. Seguiremos con interese o seu percorrido.

Galiza será Nación

2006-06-08T17:22:00.000+02:00

A web da Xente moza de Curtis acaba de colgar na web www.youtube.com o vídeo do curtiense Edilberto Alonso na que se canta ao carácter nacional de Galiza. Bos ventos semellan percorrer o ciberespazo para a consideración nacional do pobo galego.

Humala, ou o contraataque do imperio

2006-06-07T02:28:00.000+02:00

Humala Ullanta perdeu as eleccións no Perú. O Imperio por fin conseguiu frear a tendencia antiamericana que se estaba a producir na latinoamérica. Venezuela, Arxentina, Brasil, Uruguai, Bolivia decidiron arredarse do grande irmán americano e comezar a levar novas políticas sociais que beneficiasen aos seus cidadáns. O imperio tiña que facer algo e deter esta tendencia que insinuaba con rematar coa doutrina «América para os Norteamericanos». Unha mágoa, pero as bases están postas. Só é cuestión de tempo.

Djalminha 2

2006-06-02T02:17:00.000+02:00

Hoxe acabo de descubrir como se soben vídeos ao blog. Toda unha experiencia. Non quero deixar pasar a oportunidade para colocar os mellores goles dun dos futbolistas que máis me impresionaron en toda a miña vida: Djalma Feitoza Dias, Djalminha. Un pracer velo xogar.

Djalminha, un heroe en Riazor

2006-06-02T01:35:00.000+02:00

Un blog interesante

2006-06-01T02:01:00.000+02:00

Ocorreu esta pasada noite. Nun dos diversos canles que existen no irc-hispano polo que ás veces me deixo caer para coñecer novas persoas, coincidín coa autora deste blog do que teño que dicir que é un dos máis frescos e interesantes que ultimamente teño lido en moito tempo. Temática variada e reflexións persoais que non deixan indiferentes, sabedoría e intimismo a partes iguais. Recomendabilísimo. Non defrauda.

Galiza no debate do Estado

2006-05-31T18:44:00.000+02:00

Galiza, coma sempre, foi un tema marxinal no debate parlamentar do Estado. Só o representante do BNG, Francisco Rodríguez, nas cortes españolas puxo o ponto sobre o i sobre as cuestións cruciais que afectan ao noso país. Crítica e colaboración. Recollerá Zapatero a luva?